Rússneski stjórnarandstæðingurinn Alexei Navalní hefur verið fundinn sekur af rússneskum dómstólum um að hafa stofnað öfgasamtök og fjármagnað öfgastefnu. Refsingin eru 19 ár til viðbótar í fangelsi. Navalní hefur ávallt neitað sök.
Navalní er nú þegar í fangelsi eftir að hafa verið dæmdur í níu ára fangelsisvist árið 2021. Hann mun því þurfa að dúsa í fangelsi næstu 26 ár.
Rússneskur dómstóll fyrirskipaði að réttarhöldin yfir Navalní færu fram fyrir luktum dyrum. Áður en dómur var kveðinn hafði Navalní gefið það út á samfélagsmiðlum að hann gerði ráð fyrir því að fá „Stalínískan“ fangelsisdóm til þess að hræða aðra mögulega andstæðinga rússneskra stjórnvalda.
Mannréttindafulltrúi Sameinuðu þjóðanna hefur þegar fordæmt dóminn sem og Evrópusambandið.
„Þessi dómur kemur í kjölfar enn eins sýndarréttarhaldanna gegn Alexei Navalní og er óásættanlegur. Þessi geðþóttadómur er svarið gegn hugrekki hans fyrir að þora að gagnrýna yfirvöld í Kremlín,“ sagði Charles Michel, formaður Evrópuráðsins.