Commander vikið úr Hvíta húsinu

Commander, sem er þýskur fjárhundur Joe Biden forseta Bandaríkjanna, hefur verið vikið úr Hvíta húsinu eftir að hafa ítrekað gerst sekur um að bíta fólk. 

Enn hefur ekki verið ákveðið hvað verður um Commander, en hann beit leyniþjón­ustu­full­trúa í Hvíta hús­inu í síðustu viku. Þetta kemur fram á vef breska útvarpsins. 

Leyniþjónustufulltrúinn fékk viðeigandi meðferð á staðnum í kjölfar atviksins. Um er að ræða ellefta atvikið, sem vitað er um, þar sem hundurinn bítur manneskju í Hvíta húsinu eða á heimili Biden-hjónanna. 

Frétt af mbl.is

Forsetahundurinn bitið fólk ellefu sinnum

Hjónunum annt um öryggi starfsmanna

Í tilkynningu frá Hvíta húsinu, sem send var út í gær, segir að forsetahjónunum sé mjög annt um öryggi þeirra sem vinna í Hvíta húsinu og þeirra sem vernda þau á hverjum degi. 

Þar segir jafnframt að hjónin séu þakklát fyrir þolinmæðina og þann stuðning sem bandaríska leyniþjónustan og allir hlutaðeigendur hafa sýnt þeim, á meðan unnið er að því að leita lausna vegna Commander. 

Segja hundinn hafa bitið fleiri

Í tilkynningunni kemur ekki fram hvar hundurinn er núna eða hvort hann muni snúa aftur í Hvíta húsið, en tilkynningin var birt skömmu eftir að CNN greindi frá því Commander hefði bitið fleiri en búið er að viðurkenna. 

Í til­kynn­ingu frá Hvíta hús­inu í júlí sagði að for­seta­hjón­in væru að vinna í því að þjálfa Comm­and­er og inn­leiða nýtt kerfi fyr­ir hann. Var þá sagt að í Hvíta hús­inu væri um­hverfið oft ófyr­ir­sjá­an­legt, ekki síst fyr­ir ung­an hund.

Commander var einnig sendur frá Hvíta húsinu árið 2021, þegar hann dvaldi hjá fjölskylduvinum Biden-hjónanna, en þá fékk hann jafnframt viðbótarþjálfun. 

• Blogga um frétt