FADA yfirgefur X

Þýska ríkisstofnunin gegn mismunun (FADA) sagði fyrr í dag að til stæði að yfirgefa samfélagsmiðilinn X (áður Twitter), sökum „gífurlegrar aukningar“ hatursorðræðu.

Hatrömm skilaboð og upplýsingafölsun hafa „sérstaklega sótt í sig veðrið“ síðan Elon Musk tók við miðlinum á seinasta ári, sagði FADA á X.

„Að okkar mati er X ekki lengur viðunandi vettvangur. Gífurleg aukning er á fjandskap í garð trans og hinsegin fólks, en einnig má sjá aukningu á kynþáttafordómum, kvenhatri, gyðingahatri og öðru af því tagi,“ segir enn fremur í færslu FADA.

Stofnunin hvatti aðrar stofnanir að spyrja sig hvort það væri réttlætanlegt að halda áfram að nota miðilinn.

Frétt af mbl.is

Rýfur þögnina á X eftir tveggja ára útlegð

Biðlaði til Musks

Eftir yfirtöku Musks á Twitter á seinasta ári hefur verið opnað á áður lokaða reikninga, ber þar að nefna fyrrum forseta Bandaríkjanna, Donald Trump.

Í kjölfar átakanna á Gasa biðlaði tæknimálaráðherra Þýskalands til Musks að „eyða reikningum sem kalla eftir eyðileggingu Ísraels og ofbeldi gagnvart gyðingum“.

Thierry Breton sem á sæti í framkvæmdarstjórn Evrópusambandsins varaði Musk við því að X væri að dreifa „ólöglegu efni og upplýsingafölsun“.

Þessu svaraði Musk og bað Breton að „telja upp þessi meintu brot“. 

• Blogga um frétt