Annalena Baerbock, utanríkisráðherra Þýskalands, segir vígamenn Hamas nota almenna borgara sem mannlega skildi í átökum sínum við Ísraelsmenn. Þetta var haft eftir henni á fjölmiðlafundi í Ísrael þar sem hún kom fram ásamt Eli Coen, utanríkisráðherra Ísrael.
„Hamas er búið að taka alla íbúa á Gasasvæðinu í gíslingu,“ segir Baerbock.
Vísar hún til þess að göng, vopnageymslur og stjórnstöðvar samtakanna eru vísvitandi staðsettar meðal íbúa. Í háskólabyggingum, stórmörkuðum, fjölbýlishúsum og jafnvel spítölum að sögn Baerbock.
Rúmlega 1300 Ísraelsmenn hafa fallið frá því Hamas ruddist inn á landsvæði Ísrael og hófu loftárásir á laugardag. Aukins ótta gætir um líf almennra borgara eftir að Ísraelar söfnuðu saman liði við landamæri Gasa og hyggja á að fara inn í norðurhluta svæðisins með her sinn. Þar búa 1,1 milljón manna.
Þjóðverjar í samvinnu við Sameinuðu þjóðirnar og Egypta, sem eiga landamæri að Gasa, hafa leitað leiða til þess að tryggja öryggi almennra borgara í hildarleiknum sem er framundan.