Sextán ára gamall piltur var handtekinn í leigubifreið í Tullinge, hverfi í Botkyrka, suður af sænsku höfuðborginni Stokkhólmi, skömmu eftir að tvær konur voru skotnar til bana í einbýlishúsi þar á öðrum tímanum í nótt að sænskum tíma.

Handtók lögregla leigubílstjórann einnig en í bifreiðinni fannst sjálfvirkt skotvopn eftir því sem sænska ríkisútvarpið SVT greinir frá. Lágu hinir handteknu í fyrstu báðir undir grun um manndráp en lögregla féll síðar frá grunsemdum sínum í garð bílstjórans og var honum sleppt úr haldi í dag.

Konurnar myrtu voru á þrítugs- og sjötugsaldri og var fjölda skota hleypt af inni í húsinu að sögn vitna sem sænskir fjölmiðlar hafa rætt við. Sextán ára pilturinn mun hafa losnað af svokölluðu HVB-heimili í gær, úrræði fyrir börn og unglinga sem lent hafa á refilstigu, svo sem vegna fíkniefnaneyslu eða annarrar skaðlegrar hegðunar.

Frétt af mbl.is

Tvær konur skotnar til bana

Grunaður um tugi brota

Hefur hann um árabil verið viðriðinn undirheimana samkvæmt gögnum frá stjórnsýsludómstól og er grunaður um á þriðja tug afbrota í málum sem ekki hefur verið hægt að dæma í þar sem hann var ósakhæfur, yngri en fimmtán ára, þegar hann framdi hin meintu brot sem meðal annars eru rán, ofbeldi og hótanir í tengslum við meðferð refsimáls. Eftir að hann varð sakhæfur hlaut hann dóm fyrir minni háttar fíkniefnabrot, það var nú í ár.

Eftir því sem SVT kemst næst er þekktur sænskur listamaður skráður til heimilis þar sem skotárásin átti sér stað en árásin mun hafa beinst að ættingja manns í undirheimunum.

SVT
Aftonbladet
Expressen

Tengdar fréttir

Óöld í Svíþjóð

Þyngstu dómarnir miðað við aldur

• Piltar teknir með skotvopn og sprengiefni í Malmö
• Manndráp orðin pöntunarvara
• 14 ára piltur grunaður um skotárásir
• Ákærður fyrir að myrða tvö börn sín

» Fleiri tengdar fréttir

• Blogga um frétt