Erlent | AFP | 15.10.2023 | 12:22

„Mikilvægustu kosningar frá falli kommúnismans“

Ekki er fjarri lagi að skoða kjörseðilinn vel áður en maður veitir atkvæði, rétt eins og þessi pólska kona gerði á kjörstað í dag. AFP

Pólverjar kjósa í þingkosningum í dag sem munu ákvarða framtíð sambands landsins við Evrópusambandið og Úkraínu en þjóðernissinnar í popúlistaflokknum Lög og réttlæti (PiS) eru sigurstranglegastir samkvæmt skoðanakönnunum.

En jafnvel þótt PiS, ráðandi flokkurinn í Póllandi, fengi flest atkvæði myndi flokkurinn líklega eiga í erfiðleikum með að setja saman ríkisstjórn, sem gæti greitt leið Donald Tusk, leiðtoga stjórnarandstöðunnar og fyrrverandi framkvæmdastjóra ESB, að ríkisstjórninni. Pólland er bæði hluti af Atlantshafsbandalaginu (NATO) og ESB.

Frétt af mbl.is

Milljón manns mótmæltu í Varsjá

Kjörstaðir opnuðu klukkan sjö í morgun að staðartíma og loka klukkan sjö í kvöld. Lokaniðurstöður munu þó sennilega ekki liggja fyrir fyrr en eftir miðnætti. Um það bil 29 milljónir manna eru á kjörskrá, þar á meðal hálf milljón erlendis.

Skyldi PiS bera sigur úr býtum í kosningunum er talið að spenna í sambandi landsins við ESB og Úkraínu verði enn þungbærari. Þá eru einnig áhyggjur á lofti um framtíð fjölmiðlafrelsis, réttindi kvenna og réttindi flóttafólks.

Frétt af mbl.is

Pólland hættir að senda vopn til Úkraínu

„Tími fyrir breytingar“

„Það er tími fyrir breytingar,“ sagði Ewa Bankowska, 43 ára gömul kona sem vinnur í fjármálageiranum, í samtali við AFP-fréttaveituna eftir að hafa greitt atkvæði í bænum Halinow, rétt utan við höfuðborgina Varsjá.

„Ég hef áhyggjur af hagkerfinu. Ég myndi vilja að við byggðum upp og að ríkisstjórnin hætti að eyða pening sem hún hefur ekki einu sinni.“

Frétt af mbl.is

Þúsundir mótmæla í Póllandi

En Dorota Zbig, 57 ára hjúkrunarfræðingur, sagði síðustu ár undir ríkisstjórn PiS „hafa verið mjög góð fyrir mig og fjölskylduna mína og ég vona að allir, þar á meðal ungt fólk, kjósi skynsamlega“.

Donald Tusk, leiðtogi stjórnarandstöðunnar, á kjörstað í dag. AFP

Mikilvægasti dagur síðan 1989

Formaður PiS, Jaroslaw Kaczynski, hefur sagt að hann vilji að Pólland haldi áfram að vera í Evrópusambandinu en að ESB eigi að vera samband „fullvalda ríkja“.

Tusk, leiðtogi stjórnarandstöðunnar og formaður Borgaravettvangsins, hefur sagt að ríkisstjórnin sé að „leiða þjóðina í vitlausa átt“.

„Þetta er mikilvægasti dagur í okkar sögu síðan 1989,“ sagði Tusk en árið sem hann vitnar þar í er árið sem fyrstu frjálsu kosningarnar voru haldnar í landinu frá lokum seinni heimsstyrjaldar.