Xi Jinping, forseti Kína, tók á móti „kærum vini” sínum, Rússlandsforsetanum Vladimír Pútín, í Peking, höfuðborg Kína í dag.
Tilefnið var alþjóðleg ráðstefna, haldin í skugga átakanna fyrir botni Miðjarðarhafs.
Kínversk stjórnvöld taka í þessari viku á móti fulltrúum frá 130 löndum þar sem rætt verður um viðskipta- og innviðaverkefni Xi, Belti og braut.
Efstur á gestalistanum er Pútín, sem er í sinni fyrstu heimsókn til alþjóðlegs stórveldis síðan Rússar réðust inn í Úkraínu með þeim afleiðingum að rússneska þjóðin einangraðist alþjóðlega.
Leiðtogarnir tveir hittust í gær við upphaf ráðstefnunnar.
Xi, sem hefur kallað Pútín „kæran vin“ sinn, hélt ræðu í opinberum kvöldverði þar sem hann minntist á átökin í Mið-Austurlöndum en bætti við:
„Þrátt fyrir að heimurinn í dag sé ekki friðsamur, þrýstingur á alþjóðleg efnahagsmál sé að aukast og framþróun í alþjóðamálum standi frammi fyrir áskorunum þá trúi ég því að söguleg tilhneiging í átt að friði, þróun, samstarfi og sameiginlegum sigrum verði ekki stöðvuð,” sagði Xi.