Rýma sex flugvelli vegna hótana

Sex flugvellir í Frakklandi hafa verið rýmdir eftir að „hótanir um árás“ bárust í tölvupósti. Þetta herma heimildir AFP-fréttastofunnar.

Flugvellirnir sem um ræðir eru við Lille, Lyon, Nantes, Nice, Toulouse og Beauvais.

Hafa flugvellirnir verið rýmdir á meðan yfirvöld kanna hvort hótanirnar séu raunverulegar, að sögn heimildarmanns AFP.

Talsmaður franska flugumferðareftirlitsins (DGAC) gat einungis staðfest rýmingar vegna sprengjuhótana á fjórum flugvöllum við AFP. Voru það flugvellir við Lille, Lyon, Toulouse og Baeuvais. Kvaðst hann ekki geta veitt frekari upplýsingar um málið.

Þetta er í þriðja skiptið á innan við viku sem rýma þarf fjölfarna staði í Frakklandi vegna hótunar.

Rýma þurfti höllina Versali, skammt frá París, í gær eftir að sprengjuhótun barst. Þá þurfti að rýma bæði Versali og Louvre-safnið í miðborg Parísar, á laugardaginn í kjölfar sprengjuhótunar.

Frétt af mbl.is

Rýma Versali í annað sinn vegna sprengjuhótunar

• Blogga um frétt