Erlent | AFP | 20.10.2023 | 19:50

Gruna áhöfn kínversks skips um skemmdarverkið

Skemmdarverk var unnið á gasleiðslu milli Finnlands og Eistlands í mánuðinum. AFP

Lögregluna í Finnlandi grunar að kínverskt skip tengist skemmdarverkunum sem unnin voru á gasleiðslu milli Eistlands og Finnlands í mánuðinum.

Eftir að þrýstingur í gasleiðslunni féll var henni lokað þann 8. október. Yfirvöld í Helsinki hafa síðan þá rannsakað bilunina sem þau segja að hafi orðið vegna „utanaðkomandi“ starfsemi.

„Ferðir skipsins Newnew Polar Bear, sem siglir undir flaggi Hong Kong, ríma við tíma og staðsetningu skemmdarverksins á gasleiðslunum,“ segir í tilkynningu frá lögregluyfirvöldum í Finnlandi.

Skemmdarverk unnin á gasleiðslunni

Sködduðu Úkraínumenn gasleiðsluna?

Vinna með Kína til að komast til botns í málinu

„Við munum vinna saman með kínverskum yfirvöldum til þess að staðfesta tilgang skipsins,“ er haft eftir Risto Lohi rannsóknarlögreglumanni í tilkynningunni.

Lögreglan staðfestir einnig að skemmdirnar hafi verið unnar af „utanaðkomandi vélknúnu afli“ og að yfirvöld hafi fundið „þungan hlut“ nálægt gasleiðslunni.

„Nýlega mynduð mengunarþyrping sem inniheldur líklega gífurlega þungan hlut hefur fundist á sjávarbotninum,“ segir Lohli.

Lögreglan mun reyna að lyfta hlutnum frá botni sjávar til þess að rannsaka hvort hann tengist skemmdarverkunum á gasleiðslunni. Talið er að það taki að minnsta kosti fimm mánuði að gera við leiðsluna.

Skemmdarverk unnin á fjarskiptastreng

Á síðasta ári voru skemmdarverk unnin á þremur gasleiðslum frá Rússlandi til vestrænna ríkja. Hefur úkraínski herinn verið sagður hafa unnið skemmdarverkið.

Einnig var greint frá því í vikunni að sænsk stjórnvöld segðu skemmdir hafa verið unnar á fjarskiptastreng sem liggur milli Svíþjóðar og Eistlands í Eystrasalti.