Alþjóðaglæpadómstóllinn (ICC) rannsakar nú hvort stríðsglæpir hafi verið framdir í Ísrael, á Gasasvæðinu og á Vesturbakkanum. 

Karim Khan, saksóknari við dómstólinn, sagði þetta eftir heimsókn sína að landamærum Egyptalands að Gasasvæðinu um helgina. 

Segir hann embætti sitt ætla að standa vörð um réttindi almennra borgara á þeim svæðum sem lögsaga dómsins nær til.

Khan varaði við því að tilraunir til þess að koma í veg fyrir að hjálpargögn berist inn á Gasasvæðið gætu brotið í bága við lög.

Fjöldi bíla fastir við landamærin

„Ég sá fjölda flutningabíla með nauðsynlegum birgðum fasta á landamærunum, þar sem enginn þarf á þeim að halda. Fasta í Egyptalandi, fasta við Rafha-landamærin,“ sagði Khan. 

Hann ítrekaði að brýnt væri að þessir flutningabílar kæmust yfir landamærin til að færa hjálpargögn til almennra borgara í neyð.

Takmarkaður fjöldi flutningabíla hefur farið yfir landamærin síðan 21. október, eða aðeins 117 bílar. Áður en átökin hófust fóru um 500 bílar að meðaltali á hverjum degi inn á svæðið með hjálpargögn. 

Ísraelsher hóf árásir á Gasasvæðið í kjölfar árásar hryðjuverkasamtakanna Hamas þann 7. október. Fleiri en 1.400 létust í árás Hamas.

Í árásum Ísraelshers hafa yfir átta þúsund manns látist, þar af er helmingur börn. 

Tengdar fréttir

Ísrael/Palestína

Drápu fimm sem földu sig í bænahúsi

• Tilkynna refsiaðgerðir gegn öfgasinnum
• Tíu Palestínumenn drepnir á Vesturbakkanum
• Bedúína bjargað úr haldi Hamas
• Mikið högg fyrir mannúðarstarf á svæðinu

» Fleiri tengdar fréttir

• Blogga um frétt