Ísraelsher hóf í nótt hernaðaraðgerð á Al-Shifa-sjúkrahúsinu á Gasa. Er yfirlýst markmið aðgerðarinnar að sigra hryðjuverkasamtökin Hamas og bjarga gíslum. 

Frá þessu greinir herinn sjálfur í færslu á miðlinum X en þar segir m.a. að IDF ætli að „framkvæma nákvæma og markvissa aðgerð á tilteknu svæði á Al-Shifa-sjúkrahúsinu“. 

Al-shifa er stærsta sjúkrahús Gasaborgar.

Sam­einuðu þjóðirn­ar telja að þúsund­ir og jafn­vel fleiri en tíu þúsund manns, þar af sjúk­ling­ar, starfs­fólk og aðrir á flótta, haldi til á sjúkra­hús­inu.

„IDF hefur rýmt sjúkrahúsið og verið í reglulegum samskiptum við stjórnendur sjúkrahússins,“ segir í færslu IDF á X. 

Frétt af mbl.is

„Þetta er ómannúðlegt“

Yfir hundrað hermenn

„Ég sá sex skriðdreka við sjúkrahúsið og yfir hundrað hermenn. Þeir komu inn á slysadeildina, sumir hermenn voru með grímu og öskruðu á arabísku „ekki hreyfa ykkur, ekki hreyfa ykkur“,“ er haft eftir Khader Al Za'anoun, sjónarvotti á spítalanum, í umfjöllun BBC.

Khaled Abu Samra, læknir á sjúkrahúsinu, sagði við CNN að IDF hefði varað við „aðgerðinni“ hálftíma áður en hún hófst.

„Við vorum beðin um að halda okkur frá gluggum og svölum. Við heyrum í brynvörðum ökutækjum. Þau eru mjög nálægt inngangi sjúkrahússins,“ sagði Samra.

Mikilvægt að vernda sjúkrahúsið

Joe Biden Bandaríkjaforseti og Benjamín Netanjahú, forsætisráðherra Ísraels, ræddu saman í síma fyrr í kvöld. Í yfirlýsingu frá Hvíta húsinu, þar sem greint er frá símtalinu, er ekki minnst á atlöguna að spítalanum.

Biden sagði fyrr á þriðjudag að mikilvægt væri að vernda sjúkrahúsið.

Ísraelsk og bandarísk stjórnvöld hafa haldið því fram að stjórnstöð Hamas sé undir sjúkrahúsinu. Hamas og stjórnendur sjúkrahússins hafa vísað ásökunum á bug.

Frétt af mbl.is

Segir 179 manns grafin í „fjöldagröf“

Uppfært klukkan 3.08:

Talsmaður Hvíta hússins, sem kýs að koma ekki fram undir nafni, segir bandarísk stjórnvöld hvorki styðja loftárásir á sjúkrahúsið né átök innan veggja þess. „[Þ]ar sem saklaust fólk, bjargarlaust fólk, sjúklingar sem reyna að fá þá læknisaðstoð, geta særst í átökunum.“

Þá ítrekaði talsmaðurinn ummæli Bidens um að mikilvægt væri að vernda bæði sjúkrahúsið og sjúklingana.

Í yfirlýsingu Hamas kenna hryðjuverkasamtökin bæði Ísrael og Bandaríkjunum um hernaðaraðgerð IDF. Með því að segja að stjórnstöð Hamas sé undir sjúkrahúsinu hafi bandarísk stjórnvöld gefið IDF „grænt ljós“ á að „fremja fleiri fjöldamorð á borgurum“.

Þá kemur einnig fram að hernaðaraðgerðin sé til marks um að Sameinuðu þjóðunum hafi mistekist að verja Palestínumenn.

Tengdar fréttir

Ísrael/Palestína

Rýming á Gasa fyrirskipuð á ný

• Forstjóri sjúkrahúss segist hafa verið pyntaður
• Danir ákæra níu fyrir að fagna hryðjuverkum
• Hamas engu nær því að samþykkja vopnahlé
• Tugum eldflauga varpað á norðurhluta Ísraels

» Fleiri tengdar fréttir

• Blogga um frétt