Frelsisflokknum spáð sigri í Hollandi
Setja bókamerki
Útgönguspár segja hollenska Frelsisflokkinn (PVV) líklegasta sigurvegarann í þingkosningum þar í landi. Geert Wilders, formaður PVV, hefur verið bendlaður við öfgahægristefnu í stjórnmálum og í gegnum tíðina sagst vilja banna múslimatrú í landinu.
Samkvæmt skoðanakönnunum markaðsrannsóknarstofunnar Ipsos er Frelsisflokkurinn með mun meira fylgi en stærsti keppinautur sinn, sem er samstarfsframboð Græna vinstriflokksins og Verkamannaflokksins í Hollandi (GroenLinks og PvA). Breska ríkisútvarpið greinir frá.
Wilders, sem er búinn að vera þingmaður í 25 ár, hyggst halda þjóðaratkvæðagreiðslu um hugsanlega úrsögn Hollands úr Evrópusambandinu (ESB) – atkvæðagreiðslu sem hann hefur nefnt „Nexit“. Holland er eitt af stofnríkjum ESB.
Hann hefur í gegnum tíðina lýst yfir mikilli andstöðu við trúarbrögð íslams og flóttamenn. Hann hefur aftur á móti mildað málflutning sinn nú er nær dregur kosningum og í gær sagði hann að til væru mikilvægari mál en að banna íslam og að hann ætlaði sér að setja þá vinnu á ís.
Erfitt að finna samstarfsflokk
Ef PVV vinnur er ljóst að sigurinn myndi hrista upp í bæði hollenskum og evrópskum stjórnmálum. Flokkurinn myndi þó sennilega eiga erfitt með að finna samstarfsflokk.
Enginn flokkur getur unnið nógu mörg sæti til þess að stjórna sjálfur og hinr þrír stærstu flokkarnir hafa gert það skýrt að þeir hafi engan áhuga á því að vinna með Wilders.
Vinstrisamstarfið, undir forystu Frans Timmermans, er talið munu hafna í öðru sæti, með 26 sæti á þingi.
Fyrr voru miklar líkur taldar á því að Hollendingar kysu fyrsta kvenkyns forsætisráðherra landsins en Dilan Yesilgoz, leiðtogi hægriflokksins VVD og arftaki Mark Rutte, fráfarandi forsætisráðherra, sækist eftir embættinu. Sá flokkur er talinn munu lenda í þriðja sæti, samkvæmt útgönguspá.
Þriðja tilboðið hugsanlega á leiðinni
Ekkert komið í stað prófanna
Í sjokki þegar þau sáu konuna í sjónum
Við höfum „runnið til baka niður brekkuna“
86 milljóna króna hagnaður Icelandair
Íranir hafna allri aðild að banatilræðinu
Palestínskir fánar hengdir upp í óþökk kirkjunnar