Frelsisflokkurinn hrósar sigri í Hollandi

Geert Wilders, formaður Frelsisflokksins (PVV), hefur hrósað sigri í hollensku þingkosningunum. 

Nú þegar búið er að telja nánast öll atkvæði er útlit fyrir að flokkurinn nái 37 sætum á þingi af 150, sem er langt umfram stærsta keppinaut flokksins, sem er samstarfsframboð Græna vinstri­flokks­ins og Verka­manna­flokks­ins. Hlaut samstarfsframboðið 25 þingsæti.

Þá hlaut miðhægri flokkurinn VVD 25 þingsæti. 

„PVV flokkurinn verður ekki lengur hundsaður,“ sagði Wilders. „Við munum stjórna.“

Frétt af mbl.is

Frelsisflokknum spáð sigri í Hollandi

Útilokuðu samstarf fyrir kosningar

Wilders hef­ur verið bendlaður við öfga­hægri­stefnu í stjórn­mál­um og í gegn­um tíðina sagst vilja banna múslima­trú í land­inu. Þá hefur hann einnig haldið því fram að hann vilji halda þjóðar­at­kvæðagreiðslu um hugs­an­lega úr­sögn Hol­lands úr Evr­ópu­sam­band­inu (ESB).

Til að Wilders geti uppfyllt markmið sitt og orðið „forsætisráðherra allra“ þarf PVV að mynda meirihluta í samstarfi við aðra þinglokka, og ná a.m.k. 76 þingsætum.  

Það gæti þó reynst hægara sagt en gert en áður en kosningarnar hófust útilokuðu stærstu flokkarnir samstarf við PVV vegna stefnu flokksins. Talið er að stjórnarmyndunarviðræður muni taka nokkra mánuði.

• Blogga um frétt