Læknir á Al-Shifa sjúkrahúsinu á Gasa segir ísraelskar hersveitir hafa handtekið forstjóra heilbrigðisstofnunarinnar og nokkra aðra heilbrigðisstarfsmenn í morgun.
„Doktor Mohammad Abu Salmiya var handtekinn ásamt nokkrum öðrum yfirlæknum,“ sagði Khalid Abu Samra, deildarstjóri á sjúkrahúsinu, við AFP fréttaveituna.
Al-Shifa er stærsta sjúkrahúsið í Gasaborg og hefur verið í brennidepli í aðgerðum Ísraelshers á Gasasvæðinu undanfarið. Herinn heldur því fram að stjórnstöð Hamas-hryðjuverkasamtakanna sé undir sjúkrahúsinu.
Hamas-liðar og stjórnendur sjúkrahússins hafa þvertekið fyrir þær ásakanir.