Erlent | mbl | 27.11.2023 | 3:47 | Uppfært 12:10

Skutu eldflaugum að bandarísku skipi

USS Mason er tundurspillir af Arleigh Burke-gerð. Ljósmynd/Bandaríski sjóherinn

Hútar í Jemen skutu fyrr í kvöld tveimur eldflaugum í átt að bandaríska tundurspillinum USS Mason, sem nú er staddur í Aden-flóa.

Tundurspillirinn hafði fyrr um kvöldið tekið þátt í aðgerðum til að bjarga olíuflutningaskipinu MV Central Park, en fimm byssumenn reyndu að ræna skipinu og neyða það til hafnar í Jemen, þar sem Hútar fara nú með völd en þeir njóta stuðnings klerkastjórnarinnar í Íran.

Kom bandaríski tundurspillirinn í veg fyrir að sjóránið heppnaðist og handtók sjóræningjana fimm.

Að sögn Jennifer Griffin, varnarmálablaðamanni Fox News, fylgdist tundurspillirinn með eldflaugunum, en þær misstu fljótlega flugið og féllu í Aden-flóa. Sagði Griffin að litið væri á þetta sem umtalsverða stigmögnun hótana Húta í garð bandarískra herskipa, sem hafa m.a. tekið þátt í að skjóta niður eldflaugar sem Hútar hafa reynt að skjóta á Ísrael.

Two senior U.S. officials tell me that Houthi forces fired two ballistic missiles at the USS Mason this evening in the Gulf of Aden following the Navy’s arrest of 5 gunmen who tried to hijack the MV Central Park. The U.S. Navy successfully rescued the vessel.
— Jennifer Griffin (@JenGriffinFNC) November 27, 2023

Dan Lamothe, varnarmálablaðamaður Washington Post, staðfesti síðan frásögn Griffin eftir eigin leiðum og bætti við að Hútar hefðu gert aðra tilraun til þess að ræna olíuflutningaskipinu sem USS Mason bjargaði.

I can confirm this, as well. Follows another hijacking attempt of the commercial tanker that the USS Mason thwarted today. https://t.co/XC7GvKZ18X
— Dan Lamothe (@DanLamothe) November 27, 2023

Ýmsir sérfræðingar í varnarmálum hafa einnig tjáð sig á Twitter/X og velt þar upp þeim möguleika að um skotflaugar af íranskri gerð, sem eiga að vera sérhannaðar til þess að hitta skip, hafi verið að ræða, en það væri þá í fyrsta sinn í sögunni sem slíkum flaugum er beitt í hernaði.