Erlent | mbl | 1.12.2023 | 13:00

Áætla að 92 þúsund taki þátt í COP28

Áætlað er að rúmlega 92 þúsund taki þátt í loftslagsráðstefnu Sameinuðu þjóðanna COP28 og tengdum viðburðum í Dúbaí.

Stóru línurnar í málflutningi Íslands á ráðstefnunni verða m.a. að niðurgreiðslum á notkun jarðefnaeldsneytis verði hætt, útfösun á notkun jarðefnaeldsneyti og málefni freðhvolfsins og hafsins. Þá verður einnig lögð áhersla á markmið Parísarsáttmálans um að hitastig jarðar hækki ekki meira en 1,5°C .

Þetta kemur fram í tilkynningu á vef Stjórnarráðsins.

Frétt af mbl.is

„Við verðum að vera bjartsýn“

Yfir 80 íslenskir fulltrúar

Yfir 80 fulltrúar fara frá Íslandi, þar á meðal formlega sendinefnd Íslands sem skipuð er fulltrúum frá forsætisráðuneytinu, umhverfis-, orku- og loftslagsráðuneytinu, utanríkisráðuneytinu, fjármála- og efnahagsráðuneytinu og Umhverfisstofnun.

Til viðbótar við sendinefndina sækja þingmenn og fulltrúar frá Reykjavíkurborg, félagasamtökum og fyrirtækjum viðburði sem tengjast loftslagsráðstefnunni.

Ráðstefnan hófst formlega í gær og er Katrín Jakobsdóttir forsætisráðherra komin út en hún verður með erindi á leiðtogaráðstefnu Loftslagssamningsins, sem fram fer í dag og á morgun.

Guðlaugur Þór Þórðarson, umhverfis-, orku- og loftslagsráðherra, tekur þátt í fundum og hliðarviðburðum  á ráðstefnunni, auk tvíhliðafunda með ríkjum og alþjóðastofnunum.

Frétt af mbl.is

Listi: Ríflega 80 fulltrúar Íslands fara á COP28

Leggja mat á árangur ríkja

Meðal stærstu mála á dagskrá þingsins er hnattræn stöðutaka, þar sem lagt er mat á árangur ríkja. Þá verður rætt um aðgerðir til samdráttar, þar sem orkuskipti eru áherslumál, sem og hnattræn markmið um aðlögun að loftslagsbreytingum.

Þá er tekið fram í tilkynningu Stjórnarráðsins að Íslandi muni leggja ríka áherslu á að mannréttindi verði virt sem og að jafnréttismál verði í hávegum höfð. 