Maðurinn sem stakk ferðamann til bana nálægt Eiffel-turninum í París í gær sór hollustueið við hryðjuverkasamtökin Ríki íslams í myndbandi sem birt var á samfélagsmiðlum, að sögn franskra hryðjuverkasaksóknara. Hann hafði áður verið handtekinn fyrir skipulagningu hryðjuverka, sem þó ekki varð af.
Í árásinni í gær lést einn Þjóðverji og tveir aðrir særðust.
Árið 2016 var hryðjuverkamaðurinn dæmdur í fjögurra ára fangelsi fyrir að skipuleggja aðra árás og hafði verið undir eftirliti frönsku öryggisþjónustunnar. Var hann einnig undir nánu sálfræðieftirliti vegna geðvandamála.
Maðurinn er róttækur íslamisti sem hafði samfélagsmiðlatengsl við gerendur annarra nýlegra hryðjuverka í Frakklandi. Þetta sagði yfirsaksóknarinn Jean-Francois Ricard við fréttamenn fyrr í dag.
Ricard segir að í október hafi móðir hans haft samband við yfirvöld því hún væri farin að hafa áhyggjur af syni sínum á nýjan leik. Ricard segir þó að þá hafi ekki verið neinn grundvöllur til að sækja hann til saka.
Maðurinn tjáði lögreglu að hann gæti ekki þolað að múslímar væru myrtir í Afganistan og Palestínu, að sögn Gerald Darmanin innanríkisráðherra Frakklands.