Ríki Evrópusambandsins samþykktu í morgun nýja stefnu er varðar málefni flóttafólks og hælisleitenda.

Var ákveðið að herða reglur og landamæri Evrópu í þeim tilgangi að létta undir með Suður-Evrópuríkjum, eins og Grikklandi og Ítalíu, sem hafa borið þungann af flæði þeirra sem leita til Evrópu. 

Til hefur staðið að mynda heilsteypta stefnu og samræmda löggjöf um málefni flóttafólks innan sambandsins frá árinu 2020. Viðræður hafa staðið yfir síðan á mánudag og var löggjöfin að lokum samþykkt í morgun.  

Ungverjar ekki par sáttir

Löggjöfin lýtur að hraðari meðferð á málum flóttafólks, uppbyggingu lokaðra búsetuúrræða, sneggri heimsendingar á hælisleitendum sem þegar hafa fengið synjun um vernd og samstöðukerfi til að létta undir með Suður-Evrópulöndunum.

Þess má geta að Ungverjaland lagðist gegn ákvæðinu um samstöðukerfi innan ESB og kveðst utanríkisráðherra landsins, Peter Szijjarto, afar ósáttur með niðurstöðuna. Engir flóttamenn fái að koma til landsins án samþykkis stjórnvalda.

Segja löggjöfina dauðagildru fyrir flóttafólk

Fjöldi samtaka sem berjast fyrir réttindum fólks á flótta hafa sagt löggjöfina grimmilega og hættulega aðgerð sem muni ýta undir þjáningar þegar viðkvæms hóps. Björgunarsamtökin Sea Watch kölluðu nýju löggjöfina dauðagildru fyrir fólk á flótta í tilkynningu í dag. 

Frontex, landamærastofnun Evrópu, greindi frá því í vikunni að yfir 355 þúsund hefðu komið ólöglega til Evrópu fyrstu ellefu mánuði ársins. Samkvæmt tölum Sameinuðu þjóðanna hafa 2.200 látið lífið á þessu ári í Miðjarðarhafinu á leið sinni til Evrópu. 

Tengdar fréttir

Á flótta

Veitingastaður við flóttamannabúðir vekur athygli

• Tólf farendur hurfu í Ermarsundið
• Kemur ekki til greina að semja við ESB
• Telur smyglara ekkert betri en hryðjuverkamenn
• Ástralska ríkið samdi við vafasöm fyrirtæki

» Fleiri tengdar fréttir

• 1 blogg um fréttina

Bloggað um fréttina

• Páll Vilhjálmsson: Vinna, velferð og hælisleitendur