Erlent | AFP | 26.12.2023 | 16:47 | Uppfært 27.12.2023 12:15

SÞ: Alvarlegar áhyggjur af árásum Ísraelshers

Palestínumenn halda á líkum hins 17 ára Ahmads Yaghi, og Ibrahims al-Titis, sem var 31 árs, í jarðarför þeirra tveggja. Þeir létust í árás Ísraelshers á al-Fawwar- flóttamannabúðirnar. AFP/Hazem Bader

Talsmaður Mannréttindafulltrúa Sameinuðu þjóðanna segist hafa „alvarlegar áhyggjur“ af árásum Ísraelshers á Gasasvæðinu. Hann hvetur herinn til þess að gera allar mögulegar ráðstafanir til að vernda almenna borgara.

„Við höfum alvarlegar áhyggjur af áframhaldandi sprengjuárásum Ísraelshers á miðhluta Gasasvæðisins,“ segir talsmaður mannréttindafulltrúa, Seif Mangango, í tilkynningu.

„Það er sérstakt áhyggjuefni að þessar síðustu og miklu sprengjuárásir komi í kjölfar þess að Ísraelsher skipaði íbúum sunnan Wadi-Gasa að flytja til miðhluta Gasa og Tal al-Sultan í Rafag.“

Frétt af mbl.is

Netanyahu lofar frekari árásum

Árásir Ísraela á flóttamannabúðir

Heilbrigðisráðuneyti Hamas-stjórnar í Palestínu hefur sagt að loftárásir Ísraelsmanna hafi drepið að minnsta kosti 70 manns í Al-Maghazi-flóttamannabúðunum á sunnudaginn.

Ísraelsher hafi einnig gert 50 atlögur með loftárásum í gær, þar á meðal á Nuseirat-flóttamannabúðirnar. Mangango segir að slíkt mannfall eftir loftárásir auki á „vaxandi og þegar hörmulegt mannúðarástand“.

Hann segir að vegir að flóttamannabúðunum hafi verið skemmdir. Það komi í veg fyrir að mannúðaraðstoð nái til þeirra sem þurfi nauðsynlega á henni að halda. Skýli og spítalar starfi af lágmarksgetu og séu hættulega yfirfull og undirfjármögnuð.

Mangango ítrekar að allar árásir þurfi að fara eftir alþjóðalögum um mannréttindi.