Vilja að allar Boeing 737 Max verði skoðaðar

Flugvélaframleiðandinn Boeing biður flugfélög um að láta skoða allar vélar af tegundinni 737 Max vegna möguleika á lausum skrúfbolta í stýrikerfinu.

Beiðnin kemur í kjölfar þess að laus skrúfbolti fannst í kerfi einnar vélar, að sögn flugmálastjórnar Bretlands. Breska ríkisútvarpið greinir frá.

„Vandamálið var greint á tiltekinni flugvél og hefur verið lagað,“ sagði Boeing í yfirlýsingu. Flugmálastjórn Bretlands segist fylgjast „grannt með skoðunum á Boeing 737 Max flugvélum til þess að finna hugsanlegan skrúfbolta í stýrikerfinu“.

Farþegar þurfi ekki að hafa áhyggjur

Boeing mælir með að skoðanir, sem taka ekki lengri tíma en tvær klukkustundir, verði framkvæmdar á næstu tveimur vikum. Að sögn Boeing skoða áhafnir flugvéla reglulega stýrikerfið fyrir flugtak.

Anthony Brickhouse, sérfræðingur í loftöryggi, segir við fréttastofuna Reuters að flugfélög þurfi að líta málið alvarlegum augum en að farþegar þurfi ekki að hafa áhyggjur af lausum skrúfboltum.

Hlutabréfaverð Boeing lækkaði um 1% í dag.

Flug­vél­ar af teg­und­inni 737 Max máttu fljúga á nýj­an leik í Bandaríkjunum árið 2020 eftir að þær höfðu verið kyrr­sett­ar í 20 mánuði vegna tveggja mann­skæðra slysa.

• Blogga um frétt