Fundu risavaxna forna borg

Fornleifafræðingar hafa fundið risavaxna forna borg í Amazon-frumskóginum, sem hefur verið falin í mörg þúsund ár.  Uppgötvunin er sögð breyta hugmyndum manna um sögu íbúa Amazon. 

Byggingar og torg í Upona-héraðinu í austurhluta Ekvador voru tengd með vel skipulögðu vegakerfi og skurðum. 

Fram kemur í umfjöllun breska útvarpsins, að svæðið liggi við rætur eldfjalls þar sem jarðvegurinn var ríkur af næringarefnum en menn telja líklegt að eldfjallið hafi einnig átt þátt í því að borgin lagðist í eyði. 

Borgir á hálendi Suður-Ameríku, eins og Machu Picchu í Perú, hafa löngum verið þekktar, en hingað til hefur verið talið að fólk byggi aðeins í litlum þorpum í Amazon, eða eins og hirðingjar. 

Breytir hugmyndum manna

„Þetta er eldra en aðrir staðir sem við vitum um í Amazon. Við höfum mjög Evrópumiðaða sýn á samfélög, en þetta sýnir að við þurfum að breyta viðhorfi okkar hvað sé menning og samfélag,“ segir prófessorinn Stephen Rostain, við Þjóðarmiðstöð vísindalegra rannsókna í Frakklandi, en Rostain leiðir rannsóknina. 

„Þetta breytir því hvernig við horfum á menningarheima í Amazon. Flestir sjá fyrir sér fámenna hópa, líklega nakta, sem búa í kofum og stunda skógarhögg. Þetta sýnir að fólk til forna bjó í flóknum þéttbýlum samfélögum,“ segir Antoine Dorison, sem kemur einnig að rannsókninni. 

Reist fyrir um 2.500 árum

Talið er að borgin hafi verið reist fyrir 2.500 árum og að fólk hafi búið þar í um 1.000 ár. 

Fornleifafræðingar eiga erfitt með að átta sig nákvæmlega á því hversu margir íbúarnir voru, en þeir telja að þeir hafi að minnsta kosti verið tugþúsundir, ef ekki mörg hundruð þúsund. 

• Blogga um frétt