Björn segir skilið við Karólínska sjúkrahúsið

Björn Zoëga hefur ákveðið að láta af störfum sem forstjóri Karólínska sjúkrahússins í Svíþjóð, en hann hefur verið forstjóri í tæp fimm ár. 

Þetta kemur fram í tilkynningu frá sjúkrahúsinu, sem fjallað er um á vefnum Life science í Svíþjóð.

Björn segir í tilkynningunni að þrátt fyrir að kóróveirufaraldurinn hafi staðið yfir lengi, og reynt mjög á sjúklinga og starfsmenn, þá hafi spítalanum tekist að taka í gagnið aðgerðir til að koma honum úr mjög erfiðri stöðu. Tekist hafi að rétta af mikinn rekstrarhalla, upp á 1,9 milljarða sænskra króna (um 25 milljarðar íslenskra króna) og bæta alla aðstöðu til muna. Nú sé ekki lengur efast um getu sjúkrahússins sem sé eitt það besta í heimi. Björn ítrekar að þessi góða staða sé starfsfólkinu að þakka. 

Unnið er að því að finna eftirmann Björns. Patrik Rossis tekur við sem starfandi forstjóri frá og með 4. mars. 

• Blogga um frétt