Erlent | AFP | 3.2.2024 | 9:40

Sýrlendingar fordæma árásir Bandaríkjanna

„Ef þið vinnið Bandaríkjamanni mein, þá munum við svara,“ var haft eftir Biden í tilkynningu. AFP/Saul Loeb

Stjórnvöld í Damaskus sögðu í morgun að hernám Bandaríkjanna á sýrlensk landsvæði gæti ekki haldið áfram.

Bandaríski herinn hæfði alls sjö staði í loftárásum sínum á íranska byltingarvörðinn og vígasveitir tengdar honum í gærkvöld.

Fjórir staðanna eru í Sýrlandi og þrír í Írak. Alls var skotið á 85 skotmörk á um 30 mínútum og notaði herinn til þess að minnsta kosti 125 sprengjur.

Loftárásin var svar Bandaríkjahers við drónaárás sem gerð var á herstöð Bandaríkjamanna í Jórdaníu 28. janúar en þrír bandarískir hermenn féllu í árásinni.

Frétt af mbl.is

Biden: Loftárásirnar munu halda áfram

Réðust ekki inn á íranskt landsvæði

Segir í yfirlýsingu frá sýrlenska hernum að í árásunum í nótt hafi fjöldi óbreyttra borgara og hermanna fallið. Auk þess hafi margir særst og tjón á almennings- og einkaeignum sé verulegt.

Kom jafnframt fram að herinn myndi frelsa allt sýrlenskt landsvæði undan hryðjuverkum og hernámi.

Bandaríkjamenn kenndu hópum, sem studdir eru af Íran, um drónaárásina í Jórdaníu á sunnudag en réðust ekki inn á íranskt landsvæði, þar sem bæði ráðamenn í Washington og Teheran virtust hafa viljað forðast allsherjarstríð.

Frétt af mbl.is

Bandaríkin hefja loftárás á Írak og Sýrland

Geta ekki réttlætt þessa árásir

Bandaríkin eru með um 900 hermenn í Sýrlandi og 2.500 í nágrannaríkinu Írak. Er það partur af alþjóðlegu bandalagi gegn íslamska ríkinu, samtökum jíhadísta sem eitt sinn réðu yfir hluta beggja landa.

Sýrlenska utanríkisráðuneytið sagði í yfirlýsingu að árásirnar væru til þess fallnar að „kveikja upp átökin í Mið-Austurlöndum á afar hættulegan hátt.“ Var árásunum bætt við skrá um brot Bandaríkjanna á sýrlensku fullveldi og landhelgi.

Kemur jafnframt fram í yfirlýsingu ráðuneytisins að Sýrland fordæmi þetta grófa brot Bandaríkjanna og hafni afdráttarlaust öllum forsendum og lygum sem bandarísk stjórnvöld hafa notað til að réttlæta þess árás.