Stoltenberg bregst við ummælum Trumps um NATO
Setja bókamerki
Jens Stoltenberg, framkvæmdastjóri Atlantshafsbandalagsins (NATO), varar við orðræðu sem grefur undan öryggi aðildarríkja en Donald Trump, fyrrverandi Bandaríkjaforseti, hótaði í gær að hann myndi hvetja Rússa til að ráðast á NATO-ríki sem stæðu ekki við fjárskuldbindingar sínar.
„Sú tillaga að bandamenn verji ekki hver annan grefur undan öllu öryggi okkar, þar á meðal öryggi Bandaríkjanna,“ segir Stoltenberg í yfirlýsingu.
Trump hótaði því í gær að ef hann yrði aftur kjörinn forseti Bandaríkjanna myndi hann ekki verja NATO-ríki sem hefðu ekki staðið við fjárhagslegar skuldbindingar sínar og jafnvel „hvetja“ Rússa til að ráðast á þau.
Trump hefur lengi verið gagnrýninn á NATO og sagt ósanngjarnt að Bandaríkin verji önnur ríki bandalagsins.
Þjóni aðeins hagsmunum Pútíns
„Atlantshafsbandalagið hefur rennt stoðum undir öryggi og hagsæld Bandaríkjamanna, Kanadamanna og Evrópubúa í 75 ár,“ sagði Charles Michel, forseti leiðtogaráðs Evrópusambandsins, á samfélagsmiðlinum X, áður Twitter.
„Óvægnar yfirlýsingar um öryggi og 5. gr. #NATO þjóna aðeins hagsmunum [Vladimírs] Pútíns [Rússlandsforseta],“ bætti hann við. „Þær færa heiminum ekki meira öryggi eða frið.“
„Þvert á móti leggur hún enn meiri áherslu á nauðsyn þess að ESB efli stefnumótandi sjálfstæði sitt og fjárfesti í vörnum sínum,“ sagði Mihchel enn fremur.
Í 5. gr. er kveðið á um að verði NATO-ríki fyrir vopnaðri árás skuli hver og einn meðlimur bandalagsins líta á verknaðinn sem árás gegn öllum bandalaginu og gera ráðstafanir til að veita landinu sem fyrir ógninni verður aðstoð.
Boða umbreytingu í grunnskólanum
Ísrael rýfur öll tengsl við UNRWA
Vilja greina niðurstöður PISA-könnunarinnar
Ekki gerlegt að sakfella eftir lýsingu í ákæru
Mjótt á munum degi fyrir kosningar
Funduðu að næturlagi vegna gruns um kvikuhlaup
Hvað verður um sakamálin ef Trump vinnur? Eða tapar?