Ungverska þingið samþykkti í dag umsókn Svía um aðild að Atlantshafsbandalaginu NATO og leið Svía þar með greið inn í sambandið sem þeir sóttust eftir aðild að í kjölfar þess er Rússar fóru með oddi og egg að nágrannaríki sínu Úkraínu.

Hafa sænsk stjórnvöld þar með mátt sæta eins árs töf á afgreiðslu umsóknar sinnar sem strandaði á stífni Tyrkja og Ungverja, en Recep Tayyip Erdogan Tyrklandsforseti hafði horn í síðu Svía fyrir að neita að framselja „kúrdíska hryðjuverkamenn“ til Tyrklands. Samþykktu Tyrkir þó eftir dúk og disk í janúar og nú Ungverjar.

Orban biðlaði til þingheims

Kallaði sænski forsætisráðherrann Ulf Kristersson daginn „sögulegan“ en Jens Stoltenberg, framkvæmdastjóri NATO, sagði Svíþjóð mundu gera bandalagið „sterkara og öruggara“.

Féllu atkvæði þannig á ungverska þinginu að 188 þingmenn greiddu atkvæði með aðildarumsókn Svía en sex voru henni andsnúnir.

Biðlaði Victor Orban, forsætisráðherra Ungverjalands, í morgun til þingheims að samþykkja umsókn Svía og sagði hernaðarsamstarf Svíþjóðar og Ungverjalands verða til þess að styrkja Ungverja í öryggislegu tilliti.

Tengdar fréttir

Úkraína

Aukinn varnartengdur stuðningur við Úkraínu

• Kona drepin nálægt Moskvu í árás Úkraínu
• Klasasprengur drepið eða sært yfir 1.000
• ESB segir upplýsingar um flugskeyti áreiðanlegar
• Heimsskipan í hættu samkvæmt MI6 og CIA

» Fleiri tengdar fréttir

• Blogga um frétt