Forgangsatriði að verja Transnistríu
Setja bókamerki
Rússnesk stjórnvöld segja það eitt af þeirra forgangsatriðum að verja landræmuna Transnistríu, sem liggur innan Moldóvu og að suðvesturlandamærum Úkraínu.
Transnistría hefur lotið stjórn aðskilnaðarsinna, sem hliðhollir eru Rússum, allt frá því Sovétríkin féllu. Á alþjóðavísu er hún aftur á móti viðurkennd sem hluti af Moldóvu.
Boðað var til sérstaks þings í dag, þess sjöunda í sögu héraðsins, og samþykktu samankomnir fulltrúar að biðja rússneska þingið að „verja“ Transnistríu frá því sem þeir segja aukinn þrýsting af hálfu moldóvskra yfirvalda.
Segjast skoða allar beiðnir
Ákallið kemur aðeins degi fyrir árlega ræðu Vladimírs Pútíns Rússlandsforseta, sem hann flytur fyrir rússnesku löggjafarsamkunduna.
Utanríkisráðuneytið í Moskvu hefur svarað og kveðst taka „allar beiðnir“ til skoðunar.
„Að verja hagsmuni íbúa Transnistríu, samlanda okkar, er eitt af okkar forgangsatriðum,“ hafa rússneskir miðlar eftir ráðuneytinu.
1.500 hermenn frá Rússlandi
Um 1.500 hermenn Rússa eru með varanlega setu í héraðinu, í því sem Kreml kallar friðargæsluverkefni.
Langflestir íbúar Transnistríu eru rússneskumælandi, en héraðið liggur á milli Dnjestr-árinnar og landamæra Úkraínu.
Aðskilnaðarsinnar börðust árið 1992 við herlið moldóvsku ríkisstjórnarinnar. Hundruð létust og rússneski herinn greip inn í átökin á endanum.
Ókeypis gas
Rússland sér Transnistríu fyrir ókeypis gasbirgðum en frá því innrásin hófst í Úkraínu hefur héraðið einangrast nokkuð frá þessum helsta bandamanni, enda sitt hvorum megin við Úkraínu.
Enn er notast við kyrillíska stafrófið í Transnistríu og héraðið hefur sinn eigin gjaldmiðil, transnistrísku rúbluna, öryggissveitir og vegabréf.
Flestir af íbúunum 465.000 hafa tvöfalt eða þrefalt ríkisfang, frá Moldóvu, Rússlandi og Úkraínu.
„Þú ert bara orðin miðaldra kona“
Segir afsökun Microsoft lélega
Sláandi tölur kalla á djúpa greiningu
Kerfið féll á prófinu
„Björguðu lífi þessa fólks“
Segir PISA-niðurstöðurnar endurspegla menntakerfið
Kennir að vera Íslendingur í þúsundasta skipti