Yfir 30 þúsund Palestínumenn hafa verið drepnir á Gasasvæðinu síðan stríðið hófst á milli Hamas-samtakanna og Ísraels fyrir tæpum fimm mánuðum síðan.
Heilbrigðisráðuneytið á Gasasvæðinu, sem er rekið af Hamas, greindi frá þessu.
Að minnsta kosti 79 manns féllu í nótt í átökum víðs vegar um Gasasvæðið, að sögn heilbrigðisráðuneytisins.
Alþjóðastofnanir og hjálparsamtök hafa varað við yfirvofandi hungursneyð á norðurhluta svæðisins.
Börn hafa látist á sjúkrahúsinu Al-Shifa í Gasaborg af völdum vannæringar, ofþornunar og víðtækrar hungursneyðar, að sögn Ashraf al-Qudra, talsmanns heilbrigðisráðuneytisins.
Hann kallaði eftir aðgerðum þegar í stað frá alþjóðastofnunum til að koma í veg fyrir fleiri dauðsföll.