Erlent | AFP | 13.3.2024 | 10:41 | Uppfært 16:10

Pútín: Rússar eiga háþróaðri kjarnorkuvopn en Bandaríkin

Vladimír Pútín, forseti Rússlands, fór fögrum orðum um kjarnorkuvopn Rússa og sagðist vera reiðbúinn að beita þeim yrði sjálfstæði landsins ógnað.

Frá því rússneski herinn réðist inn í Úkraínu fyrir tveimur árum þá hafa yfirvöld í Rússlandi stært sig af kjarnorkugetu sinni. Í síðasta mánuði sendu þau Vesturlöndunum tóninn þegar þau sögðu að það væri raunveruleg hætta á kjarnorkustríði færi svo að vestræn ríki myndu hella olíu á stríðsbálið.

Pútín lét ummælin falla örfáum dögum áður en forsetakosningar fara fram í Rússlandi, en augljóst þykir að Pútín muni tryggja sér önnur sex ár á forsetastóli. Á sama tíma hefur rússneski herinn sótt fram í Úkraínu og náð fleiri svæðum á sitt vald.

Frétt af mbl.is

Reiðubúnir að beita kjarnorkuvopnum

Komin fram úr tækni Bandaríkjanna

Pútín sagði í samtali við ríkissjónvarpsstöð að kjarnorkuvopn Rússa væru mun nútímalegri en kjarnorkuvopn annarra þjóða. Aðeins Bandaríkin væru, eins og Rússar, með getu til að skjóta slíkum vopnum af landi, úr kafbátum og úr lofti. Pútín bætti svo við að tækni Rússa hefði þróast mikið og væri komin fram úr tækni Bandaríkjanna.

„Við erum reiðubúin að nota vopn, þar með hvaða vopn sem er – þar á meðal þau vopn sem þú minntist á – ef það er spurning um tilverurétt rússneska ríkisins eða að sjálfstæði okkar skaðast eða fullveldi,“ bætti Pútín við.

Gerði lítið úr ummælum Frakklandsforseta

Þá blés Pútín á ummæli sem Macron Frakklandsforseti lét falla í liðnum mánuði, en Macron útilokaði ekki að senda herlið til Úkraínu. Þar kvað við annan tón vestræns þjóðarleiðtoga um stríðið.

„Staðreyndin er sú að herlið vestrænna ríkja hafa verið í Úkraínu lengi,“ fullyrti Pútín. Hann vísaði þar til hópa sem rússnesk stjórnvöld hafa kallað málaliða.