Skaut manninn og veitti svo hjartahnoð

Áströlsk lögreglukona er talin hafa unnið mikla hetjudáð þegar hún skaut mann til bana sem stakk fólk af handahófi í verslunarmiðstöð í Sydney.

Konan, sem var ekki á vakt, elti manninn uppi í verslunarmiðstöðinni og skaut hann eftir að hann gerði sig líklegan til að veita henni áverka.

Anthony Albenese, forsætisráðherra Ástralíu, segir ekki nokkurn vafa leika á því að lögreglukonan hafi bjargað mannslífum með inngripi sínu.

Níu mánaða barn særðist og móðirin látin 

Átta fórnarlömb eru vistuð á sjúkrahúsi en sex eru látnir eftir árásina. Þar af eru fimm konur.

Sjónarvottur segir að maðurinn hafi verið á greiðum gangi í átt að honum þegar lögreglukonan skaut manninn. Því næst ýtti hún hnífnum í burtu áður en hún veitti árásarmanninum hjartahnoð.

Meðal hinna særðu er níu mánaða barn sem er í skurðaðgerð en móðir þess er meðal hinna látnu.

Reyndu að stöðva árásarmanninn

Ekkert hefur verið gefið upp hvað árásarmanninum gekk til og hvers vegna hann tók upp á ódæðinu.

Mikill mannfjöldi var samankominn í verslunarmiðstöðinni sem er ein sú vinsælasta í Ástralíu þegar árásin var gerð um miðjan dag. Langflestir reyndu að troða sér inn í verslunarrými þó einhverjir hafi reynt að stöðva árásarmanninn að sögn sjónarvotts.

Á myndböndum sem erlendir fréttamiðlar hafa birt má m.a. sjá árásarmanninn á hlaupum um ganga verslunarmiðstöðvarinnar.

BBC segir frá. 

• Blogga um frétt