Mikil óvissa ríkir hins vegar um það hvernig svar Ísraelsmanna verður og hvenær, en vestrænir hernaðarsérfræðingar segja þá hafa ýmsa valkosti í stöðunni. Ísraelsmenn muni þó einnig þurfa að hafa í huga að frekari hernaðaraðgerðum af þeirra hálfu gæti fylgt aukin hætta á því að allsherjarstríð brjótist út á milli ríkjanna tveggja.

Þá hafa helstu bandamenn Ísraels einnig hvatt til þess að Ísraelar haldi að sér höndum í ljósi þess að mikil ólga ríkir nú í Mið-Austurlöndum vegna stríðsins á Gasasvæðinu. Bandaríkjastjórn lýsti því t.d. sérstaklega yfir í gær að hún myndi ekki taka þátt ef Ísraelar ákvæðu að ráðast á Íran. Bandaríkjamenn ætla sér þó að reyna að refsa Írönum með öðrum hætti fyrir árásina, og má eiga von á því að hún grípi m.a. til viðskiptaþvingana gegn Íran á næstu dögum.

Einnig er talið líklegt að Bandaríkin, Bretland og Frakkland muni áfram verja Ísrael fyrir frekari árásum frá Íran og leppum þeirra í Mið-Austurlöndum, en bandarískar orrustuþotur skutu niður um 70 íranska sjálfseyðingardróna í árásinni í fyrrakvöld.

Málinu „lokið“ af hálfu Írana

Klerkastjórnin sjálf reyndi svo að letja Ísraelsmenn frá frekari árásum í gær, en hún lýsti því meðal annars yfir að árásin hefði verið réttmæt sjálfsvörn af þeirra hálfu vegna árásar Ísraelshers á ræðismannsbústað Írans í Damaskus 1. apríl. Sögðu talsmenn klerkastjórnarinnar jafnframt að með árásinni í gær væri málinu „lokið“ af sinni hálfu, en að ef Ísraelsmenn myndu svara, mætti eiga von á því að Íranar myndu svara í sömu mynt.

Hægt er að nálgast umfjöllunina í heild sinni í Morgunblaðinu.

Tengdar fréttir

Íran gerir árás á Ísrael

Ræddu um að sameina krafta sína

• Reiðubúnir að „verja fullveldi sitt“
• Íranir vara Ísraela við árásum á innviði
• Æðstiklerkur: „Palestínumenn höfðu rétt fyrir sér“
• Olíuverð hækkaði eftir ummæli Bidens

» Fleiri tengdar fréttir