Skólum og skrifstofum hefur verið lokað í Sameinuðu arabísku furstadæmunum í dag vegna óveðurs í nótt. Þetta er í annað sinn á tveimur vikum sem óveður með hellirigningu skellur á svæðið.
Mikið vatnsveður fylgdi óveðrinu, eða meira en 50 mm af úrkomu, og aflýsa eða fresta þurfti allt að 13 flugferðum í Dúbaí vegna flóða. Einnig hafa félögin Emirates og flydubai varað farþega við frekari frestunum.
Ekki hafa verið margir á ferðinni í Dúbaí í dag vegna flóða og eru margir yfirgefnir bílar úti á götum. Skólahald fer fram í gegnum fjarkennslu og skrifstofum hefur verið lokað.
Óveðrið í nótt var þó ekkert í samanburði við veðrið þann 16. apríl þegar úrkoma mældist 259,5 mm og 25 manns létust á Persaflóa og í Óman.
Úrkoman þann 16. apríl var sögulegur viðburður og sló öll met frá því að mælingar hófust árið 1949.
World Weather Attribution, hópur vísindamanna sem greinir hlutverk hlýnunar jarðar í veðurhamförum, telur hlýnun jarðar vera eina helstu ástæðu óveðursins og að áframhaldandi brennsla jarðefnaeldsneytis auki líkurnar á slíkum atburðum.