Rússar sækja fram í Úkraínu

Rússar hafa náð yfir 30 bæjum og þorpum í norðausturhluta Karkív-héraðs í Úkraínu á sitt vald eftir að hafa hafið óvænta sókn á landamærum Úkraínu á föstudag. 

Yfirvöld í Úkraínu hafa gefið út að Rússar hafi náð „taktískum árangri“ eftir árásir síðustu daga. 

Meira en sex þúsund íbúar hafa þurft að flýja heimili sín.

Frétt af mbl.is

Grimmileg orrusta í Karkív

Stöðugar árásir Rússa

Oleg Synegubov, héraðsstjóri Karkív, tjáði sig um árásirnar á samfélagsmiðlum og sagði svæðið hafa verið undir stöðugum árásum Rússa undanfarna daga. Að minnsta kosti níu særðust í árásunum. 

Samkvæmt heimildum AFP-fréttastofunnar gerði Úkraína drónaárás á vesturhluta Rússlands. Drónar á vegum Úkraínumanna lentu á olíustöð á Belgorod-landamærasvæðinu og rafmagnsaðveitustöð á Lipetsk-svæðinu.

Harðir bardagar eru nú við landamærin. AFP/Roman Pilipey

Rússnesk yfirvöld á svæðinu sögðu að kona hefði látist og þrír hafi særst þegar dróni lenti á bílum.

Stjórnvöld í Rússlandi og Úkraínu hafa ráðist á orkuinnviði hvorra annarra og hafa framleiðslustöðvar Úkraínu orðið fyrir miklum skemmdum síðan stríðið hófst.

Á Telegram-síðu nátengdri stjórnvöldum í Úkraínu hefur komið fram að rússneskir hermenn séu búnir að ná yfir 100 kílómetra svæði við landamærin. 

Frétt af mbl.is

Rússar herða sókn í Úkraínu

• Blogga um frétt