Kínversk stjórnvöld lýsa þungum áhyggjum af hernaði Ísraela í Rafah í kjölfar þess að á fimmta tug létust þegar eldur kviknaði í flóttamannabúðum vegna árásar Ísraelshers.
Öryggisráð Sameinuðu þjóðanna hefur boðað til neyðarfundar vegna hernaðaraðgerða Ísraelshers í dag.
Árásin hefur vakið hörð viðbrögð alþjóðasamfélagsins. Hafa margir kallað árásina fjöldamorð. Stjórnvöld í Ísrael segja að um hörmulegt slys hafi verið að ræða.
Kína „lýsir yfir þungum áhyggjum af yfirstandandi hernaðaraðgerðum í Rafah,“ sagði Mao Ning, talsamaður kínverska utanríkisráðuneytisins.
Hvetja kínversk stjórnvöld til þess að innviðum og almennum borgurum sé hlíft. Þá hvetja þau Ísrael til að hlusta á alþjóðasamfélagið og stöðva árásir sínar á Rafah.