Lík hefur fundist í tengslum við leitina að breska sjónvarpslækninum Michael Mosley á grísku eyjunni Symi.
BBC greinir frá þessu en Mosley hefur verið saknað síðan á miðvikudag.
Hann var í fríi á eyjunni ásamt eiginkonu sinni er hann fór einn í göngutúr um hádegisbil á miðvikudag. Mosley skildi símann sinn eftir á hótelinu sem þau dvöldu á.
Mikil leit hefur staðið yfir í fjalllendi á eyjunni í nærri fimm daga.
Ekki hafa enn verið formlega borin kennsl á líkið sem fannst á litlum kletti í grýttri hæð norðaustur af þorpinu Pedi, nærri Agia Marina-ströndinni þar sem Mosley skildi við eiginkonu sína á miðvikudag.
Heimildarmaður BBC innan grísku lögreglunnar greindi frá því að hinn látni hefði verið látinn í „nokkra daga“.
Borgarstjóri Symi sagði líkið hafa fundist þegar björgunarsveitir leituðu á strandlengjunni með myndavélum.
Fréttin hefur verið uppfærð.