Róttækir sækja á en hófsamir halda velli

Miðju- til hægriflokkahópurinn EPP, eða Kristilegir demókratar, heldur flestum þingsætum á Evrópuþingi miðað við útgönguspár. Á sama tíma sækja róttækir hægriflokkar í sig veðrið.

Kjósendur í 21 af 27 ríkjum Evrópusambandsins gengu til kosninga í dag. Samkvæmt útgönguspám heilt yfir Evrópu halda þrír hófsamir flokkahópar áfram meirihluta í Evrópuþinginu. Kristilegir demókratar eru með 181 þingsæti og bæta við sig 10 þingsætum.

Þar á eftir kemur flokkahópur Jafnaðarmanna með 135 þingsæti og svo kemur flokkahópur Frjálslyndra með 82 sæti. Í Evrópuþinginu eru 720 þingsæti og hófsömu flokkarnir því með meirihluta áfram. 

Flokkur Le Pen með yfirburði í Frakklandi

Aðrir hægriflokkar og róttækir hægriflokkar eru ansi tvístraðir á Evrópuþinginu en eru samanlagt að fá á annað hundrað þingsæti.

Í Frakklandi er hægriflokkur Le Pen að gjörsigra en í útgönguspám fær hann um 33% fylgi á sama tíma og flokkur Emmanuels Macrons Frakklandsforseta fær um 15%.

Macron tilkynnti í kvöld að hann myndi leysa upp Frakklandsþing og efna til nýrra þingkosninga eftir nokkrar vikur.

Frétt af mbl.is

Leysir upp þingið og boðar til kosninga

AFD með meira fylgi en Jafnaðarmannaflokkurinn

Í Þýskalandi fá Kristilegir demókratar um 30% fylgi. Jafnaðarmannaflokkur Olaf Scholz Þýskalandskanslara fær um 14% fylgi sem er minna en róttæki hægriflokkurinn AFD, sem er með 16% fylgi.

Miðað við fyrstu útgönguspár á Ítalíu fær hægriflokkur Giorgiu Meloni um 25-31% atkvæða og er með mest fylgi. Næstmest fylgi hlýtur vinstrisinnaði Lýðræðisflokkurinn og þar á eftir fylgja hægriflokkar.

Á Spáni vann hægrisinnaði Partido Popular 22 þingsæti en Sósíalistaflokkur forsætisráðherrans Pedro Sanchez laut í lægra haldi með 20 sæti. Þar á eftir kom róttæki hægriflokkurinn Vox.

• 2 blogg um fréttina

Bloggað um fréttina

• Ingólfur Sigurðsson: Macron og Katrín Jakobsdóttir eru svipuð. Þau hafa stjórnað löndum …
• Wilhelm Emilsson: Miðjan á hreyfingu