Erlent | AFP | 18.6.2024 | 7:43 | Uppfært 10:18

Þakkaði N-Kóreu fyrir stuðninginn

Kim Jong-un og Pútín á samsettri mynd. AFP/Sergei Ilyin

Vladimír Pútín Rússlandsforseti hrósaði Norður-Kóreu fyrir að „styðja dyggilega við bakið” á Rússum í stríðinu þeirra í Úkraínu, áður en hann heimsótti höfuðborgina Pyongyang.

Búist er við því að Pútín ætli að styrkja tengsl ríkjanna þegar kemur að varnarmálum en bæði ráða þau yfir kjarnavopnum.

Pútín á leið til Norður-Kóreu

Áætlað er að Pútín lendi í Norður-Kóreu í kvöld og er þetta fyrsta heimsókn hans þangað í 24 ár.

Norður-Kóreumenn í skrúðgöngu árið 2021 þegar þeir fögnuðu því að 73 voru liðin frá stofnun ríkisins. AFP/Kim Won Jin

Rússar og Norður-Kóreumenn hafa verið samherjar allt frá stofnun Norður-Kóreu að lokinni síðari heimsstyrjöldinni. Samband þeirra hefur jafnvel orðið nánara eftir að Rússar réðust inn í Úkraínu árið 2022, sem leiddi til þess að Pútín einangraðist alþjóðlega.

Bandaríkjamenn og samherjar þeirra hafa sakað Norður-Kóreu um að útvega Rússum vopn, þar á meðal langdrægar eldflaugar til að nota í Úkraínu.

Frétt af mbl.is

Hefur áhyggjur af sambandi N-Kóreu og Rússlands

Norður-Kóreumenn hafa aftur á móti neitað því að hafa útvegað Rússum vopn en áður en Pútín lagði af stað þangað þakkaði hann ríkisstjórn Kims Jong-un, leiðtoga Norður-Kóreu, fyrir aðstoð í stríðinu.

Kim Jong-un og Pútín takast í hendur í Rússlandi á síðasta ári. AFP/Vladimir Smirnov

„Við kunnum mjög svo að meta að Norður-Kórea styður dyggilega sérstakar hernaðaraðgerðir Rússa í Úkraínu,” skrifaði Pútín í grein sem var birt í norðurkóreskum ríkisfjölmiðli.

Hann bætti við að Rússar og Norður-Kórea væru „núna að þróa áfram margþætt samstarf” og að heimsókn hans myndi færa samstarf ríkjanna á „hærra stig”.

Bæði ríkin hafa verið beitt refsiaðgerðum af hálfu Sameinuðu þjóðanna, eða Norður-Kórea frá árinu 2006 vegna þróunar kjarnorku- og langdrægra eldflauga og Rússar vegna stríðsins í Úkraínu.

Pútín hrósaði Norður-Kóreu fyrir að „verja hagsmuni sína á afar árangursríkan hátt þrátt fyrir efnahagslegan þrýsting Bandaríkjanna, ögranir, kúganir og hernaðarlegar hótanir sem hafa varað í áratugi”.