Minnst sjö lögreglumenn, einn prestur og einn þjóðvarðliðsmaður létu lífið í árás sem gerð var á trúarbyggingar í Dagestan í Norður-Kákasus í Rússlandi í dag.
Árásirnar voru gerðar í stærstu borg Dagestan, Makhachkala, og í strandborginni Derbent, þar sem skotbardagar stóðu yfir í kvöld. Hafin hefur verið glæparannsókn vegna „hryðjuverka“ og er lögregla sögð hafa drepið fjóra byssumenn í Makhachkala.
„Í kvöld voru gerðar vopnaðar árásir á tvær rétttrúnaðarkirkjur, samkunduhús og lögreglustöð í borgunum Debent og Makhachkala,“ segir í yfirlýsingu yfirvalda.
Gajana Garíjeva, talskona innanríkisráðuneytis Dagestan, sagði alls sex lögreglumenn hafa verið drepna í árásunum og tólf særða. Síðar greindi hún frá því að lögreglustjóri á staðnum hefði látist af sárum sínum.
Á sama tíma greindi rússneska þjóðvarðliðið frá því að einn af yfirmönnum liðsins hefði verið drepinn í Derbent og nokkrir verið særðir.
Þá átti sér jafnframt stað árás í þorpinu Sergokal, sem er 65 kílómetrum frá Makhachkala. Samkvæmt upplýsingum frá innanríkisráðuneyti Dagestan skutu árásarmenn þar á lögreglubíl og særðu einn lögreglumann.
Þá sagði Garíjeva jafnframt að 66 ára gamall rétttrúnaðarprestur hefði verið myrtur í Derbent.