Erlent | mbl | 27.6.2024 | 21:25

Hafna samkomulagi fjölskyldunnar á bak við OxyContin

Samkomulagið hefði skýlt Sackler fjölskyldunni undan persónulegri ábyrgð vegna ópíóíðafaraldursins. AFP

Hæstiréttur Bandaríkjanna hefur hafnað sáttarsamkomulagi fyrirtækisins Purdue Pharma upp á 6 milljarða bandaríkjadala, eða tæpa 139 milljarða íslenskra króna.

Niðurstaðan hefur þá þýðingu að fyrirtækinu er meinað í halda áfram með gjaldþrotaferli í bili og verður málið tekið upp að nýju í desember.

Frétt af mbl.is

Lyfjarisi greiðir sögulega háa sekt

Greiddu sér milljarða dala rétt fyrir gjaldþrotið

Var ætlunin að fjárhæðin yrði greidd í „endurskipulagningarsjóð Purdue“ sem myndi m.a. ganga til fórnarlamba faraldursins og til forvarnarstarfsemi gegn ópíóíðafíkn í Bandaríkjunum.

Samkomulagið átti að fela það í sér að Sackler-fjölskyldan, sem átti Purdue Pharma þar til nýlega, bæri ekki persónulega ábyrgð í tengslum við málssóknir vegna ópíóíðafaraldursins. Sackler fjölskyldan greiddi sér milljarða bandaríkjadala úr fyrirtækinu áður en þau lýstu yfir gjaldþroti.

Hafa viðurkennt villandi markaðssetningu

Lyfjafyrirtækið er sagt hafa kynt undir ópíóíðafaraldrinum í Bandaríkjunum með framleiðslu og markaðssetningu á ópíóíðaverkjalyfjum á borð við OxyContin og hefur gengist við því að hafa staðið fyrir villandi markaðssetningu.

Hæstiréttur Bandaríkjanna hefur hafnað sáttarsamkomulagi fyrirtækisins Purdue Pharma. AFP/Jim Watson

Úrskurður hæstaréttar féll með atkvæðum fimm dómara af níu en fjórir voru andvígir niðurstöðunni. Var meirihlutinn sammála um að Sackler-fjölskyldan hefði hagnast um tugi milljarða bandaríkjadala á sölu ávanabindandi ópíóíða, og ættu því ekki að njóta friðhelgi gegn einkamálum í tengslum við hlutverk þeirra í ópíóíðafaraldrinum. Sagði í úrskurði dómstólsins að gjaldþrotareglur heimili ekki slíkt ákvæði.