Rússneskir hermenn réðust á borgina Dnípró í Úkraínu með dróna- og flugskeytaárásum í morgun. Þrír létust og átján særðust, þar á meðal 14 ára stúlka.
„Óvinurinn heldur áfram að gera hryllilegar árásir,“ sagði Sergí Lisak, héraðsstjóri í Dnípró, í kjölfar árásanna.
Mikóla Lúkasjúk, yfirmaður héraðsráðs í Dnípró, sagði árásirnar hafa valdið gríðarlegu tjóni í borginni, en ekki er búið að gera grein fyrir öllum afleiðingum árásarinnar.
Íbúar í Dnípró voru um ein milljón fyrir stríð, en rússneski herinn hefur markvisst gert árásir á borgina síðan stríðið hófst í febrúar 2022. Yfir 40 manns létu lífið í árás Rússa á Dnípró í janúar 2023.