Stungin til bana á tjaldstæði

Maður á sextugsaldri er í haldi lögreglunnar í Østfold í Noregi, grunaður um að hafa stungið konu á sjötugsaldri til bana á tjaldstæði í Aremark síðdegis í gær, norðan við Halden og ekki ýkjalangt frá landamærum Noregs og Svíþjóðar.

Fjöldi lögreglubifreiða hélt á vettvang þegar tilkynning barst um atburðinn laust fyrir klukkan 18 að norskum tíma en hafði konan þá þegar hlotið þau sár er ekki þurfti að græða. „Þolandanum var veitt fyrsta hjálp en var svo úrskurðaður látinn,“ sagði Alf Minohti, ákæruvaldsfulltrúi lögreglunnar í Østfold, í samtali við norska ríkisútvarpið NRK eftir atburðinn.

„Hinn handtekni er grunaður um manndráp. Við getum einnig staðfest að tengsl voru á milli grunaða og fórnarlambsins,“ sagði Minohti enn fremur.

Ekki tekið afstöðu til sakar

Var tæknideildarfólk lögreglu við störf á tjaldstæðinu fram á nótt í gær auk þess sem lögregla ræddi við vitni og hélt því áfram í dag að sögn Arve Hermansen lögregluvarðstjóra.

Grunaða hefur verið úthlutaður verjandi, Ann Turid Bugge, sem kvaðst í morgun hafa rætt við skjólstæðing sinn en hafði þá enn sem komið var ekkert að segja um afstöðu hans til sakarefnisins. Reiknaði hún með yfirheyrslum í dag.

Thomas Martinsen var einn fjölmargra gesta á tjaldstæðinu í Aremark þegar konan var svipt lífi sínu og kvað hann fjölda fólks hafa verið þar saman kominn, þar á meðal börn. „Það voru skelfilega margir á staðnum þegar þetta gerðist,“ sagði Martinsen.

Varabæjarstjóri Aremark, Stig Aarbu, sagði íbúum staðarins mjög brugðið eftir atburðinn. „Þetta er hræðilega dapurlegt og hefur áhrif á alla. Þetta átti ekki að gerast, en því miður gerðist það,“ sagði Aarbu en áfallahjálparteymi bæjarins var virkjað þeim til stuðnings sem þurft hafa á að halda.

NRK

VG

TV2

• Blogga um frétt