Trump skotinn: Tveir látnir og einn illa særður
Setja bókamerki
Skotum var hleypt af á kosningafundi Donalds Trumps í Pennsylvaníu í Bandaríkjunum fyrr í kvöld. Trump er heill á húfi.
Tveir eru sagðir látnir, meintur árásarmaður og einn gestur á fundinum, samkvæmt fréttafluttningi vestanhafs. Aukinheldur er einn sagður alvarlega særður.
Trump staðfestir á samfélagsmiðlinum Truth Social að byssukúlan hafa strokið hægra eyrað á sér en Trump var tekinn til skoðunar á sjúkrahúsi í kjölfar atviksins.
Stökk í jörðina
Skothvellir trufluðu ræðu Donalds Trumps, fyrrverandi Bandaríkjaforseta, á kosningafundi hans fyrr í kvöld.
Trump henti sér í jörðina á meðan leyniþjónustumenn umkringdu forsetann fyrrverandi til að gæta öryggis hans. Sviðið var síðan umkringt vopnuðum sérsveitarmönnum.
Lá hann á jörðinni í um það bil mínútu. Trump stóð þá upp á fætur og reisti hnefann í loftið áður en honum var fylgt af sviðinu, inn í bifreið og síðan ekið af vettvangi.
Virðist hann hafa sagt eitthvað er hann stakk hnefanum í loftið. „Berjist,“ hafa sjónarvottar eftir honum.
Blóð á eyranu
Trump strauk á sér eyrað áður en hann henti sér í jörðina. Myndir sýna blóð á eyra hans leka niður kinnina.
J.D. Vance, þingmaður Repúblikanaflokksins í Ohio, sagði í færslu á samfélagsmiðlinum X: „Biðjið með mér fyrir Trump forseta og öllum á þessum fundi. Ég vona að allir séu heilir á húfi.“
Trump „í lagi“ og rannsókn „í fullum gangi“
Steven Cheung, talsmaður Trumps, segir í yfirlýsingu að Trump sé í lagi og hafi verið tekinn til skoðunar á spítala í ríkinu.
Talsmaðurinn bætti við að Trump vildi þakka löggæslu og viðbragðsaðilum fyrir skjót viðbrögð við „þessu svívirðilega ódæði“.
„Leyniþjónustan hefur gripið til verndarráðstafanna og forsetinn fyrrverandi er heill á húfi. Nú er rannsókn á vegum leyniþjónustunnar í fullum gangi og frekari upplýsingar verða birtar þegar þær liggja fyrir,“ skrifar Anthony Guglielmi, samskiptastjóri Bandarísku leyniþjónustunnar, á samfélagsmiðlinum X.
Biden þakklátur að Trump lifði af
Joe Biden Bandaríkjaforseti segist þakklátur að Trump hafi lifað af árásina. Kamala Harris hefur einnig verið uplýst um skotárásina.
Biden kveðst fordæma allt pólitískt ofbeldi. „Allir, allir verða að fordæma það,“ sagði hann á blaðamannafundi upp úr miðnætti á íslenskum tíma.
Chuck Schumer, þingflokksforðmaður Demókrata í öldungadeild, segist vera brugðið yfir skotárásinni.
„Ég er skelfingu lostinn yfir því sem gerðist á Trump-fundinum í Pennsylvaníu og létt yfir því að Trump, fyrrverandi forseti, sé heill á húfi. Pólitískt ofbeldi á sér engan stað í okkar landi,“ skrifar Schumer á X-inu.
Sterk viðbrögð
Árásin hefur vakið sterk viðbrögð utan úr heimi. Þjóðarleiðtogar hafa sagst vera brugðið yfir árásinni.
Auðkýfingurinn Elon Musk hefur lýst yfir fullum stuðningi við Trump í kjölfar árásarinnar.
Fréttin hefur verið uppfærð.
Björguðu vélarvana seglskútu við Raufarhöfn
„Hvað á það að kosta mörg slys?“
Enginn handtekinn en framkoman til skammar
Skipverjarnir dæmdir í skilorðsbundið fangelsi
Pelosi og Obama ræddu um Biden og framboðið
Kostnaður fimmfalt hærri á þessu ári
Ók á vegrið á Hellisheiði
Tvær bílaleigur gjaldþrota það sem af er sumri