Erlent | mbl | 14.7.2024 | 15:43 | Uppfært 15.7.2024 12:23

Fundu tvær sprengjur í bíl Crooks

Sprengjusveit keyrir að heimili Crooks. AFP

Tvær sprengjur eru sagðar hafa fundist í bíl mannsins sem er grunaður um að hafa reynt að ráða Donald Trump af dögum í gær. Þá hefur þriðja sprengjan mögulega fundist á heimili hans. Frá þessu greina miðlar vestanhafs.

Skotum var hleypt af á kosningafundi Donalds Trumps, fyrrverandi Bandaríkjaforseta, í Pennsylvaníu í Bandaríkjunum í gær. Trump er heill á húfi en er særður á eyranu.

Tveir eru sagðir látnir, meintur árásarmaður og einn gestur á fundinum.

Aukinheldur eru tveir sagðir alvarlega særðir.

Frétt af mbl.is

Skráður sem kjósandi repúblikana

Lögreglan í Butler hefur girt af götuna þar sem meintur árásarmaður bjó. AFP

Sprengjusveit kölluð út

Wall Street Journal greinir frá að bíl Thomas Matthew Crooks, meints byssumanns, hafi verið lagt nálægt kosningafundinum, að sögn sjónarvotta.

Lögreglu barst fjöldi tilkynninga um grunsamlega böggla í kringum svæðið þar sem skotmaðurinn hafði verið og voru sprengjusérfræðingar sendir á vettvang. Þá hafi sprengiefni fundist í bíl Crooks.

Heimildarmenn New York Times segja að tvær sprengjur hafi fundist í bíl Crooks og hugsanlega þriðja sprengja á heimili hans. Þá mun hríðskotariffill hafa fundist á vettvangi.

Tvítugur maður

Crooks var 20 ára gamall og útskrifaðist frá Bethel Park–menntaskólanum í Pennsylvaníu árið 2022. Heimabær hans er í um 55 kílómetra fjarlægð frá Butler–býlinu þar sem kosningafundurinn var haldinn.

Crooks hafði komið sér fyrir á þaki húss utan fundarins, í um 120 til 150 metra fjarlægð frá sviðinu sem Trump stóð á, þegar skotunum var hleypt af. Nokkrum sekúndum síðar var hann skotinn til bana af öryggisþjónustunni.