Bandarískir saksóknarar hafa ákært fyrrverandi sérfræðing hjá leyniþjónustu Bandaríkjanna, CIA, vegna ásakana um að hún hafi starfað fyrir suðurkóresk stjórnvöld gegn því að fá að launum dýrar handtöskur, málsverði á dýrum veitingastöðum og annan lúxus.
Sue Mi Terry lét bandarísk stjórnvöld ekki vita af því að hún starfaði fyrir erlent ríki og veitti sömuleiðis Suður-Kóreumönnum leynilegar upplýsingar frá bandarískum stjórnvöldum, að því er kemur fram í 31 blaðsíðu ákæruskjali sem var lagt fram í New York.
Á meðal þess sem Terry er sökuð um að hafa þegið að launum er handtaska frá Louis Vuitton að andvirði um 490 þúsund krónur, handtaska frá Bottega Veneta upp á um 420 þúsund krónur og kápa frá Dolce & Gabbana fyrir um 400 þúsund krónur.
Einnig snæddi hún á „mörgum" Michelin-veitingastöðum.