Peter Navarro, viðskiptaráðgjafi Donalds Trumps er hann gegndi embætti Bandaríkjaforseta, hefur lokið fjögurra mánaða afplánun sinni og er væntanlega á leið á landsfund repúblikana í Wisconsin-ríki.
CNN greinir frá.
Gert er ráð fyrir því að Navarro fari beint á landsfundinn, sem hófst á mánudag og klárast annað kvöld.
Fréttaveita ABC hafði áður greint frá því, að sögn heimildarmanna, að Navarro myndi fá að ávarpa landsfundinn. Það liggur ekki fyrir að svo stöddu.
Navarro var dæmdur til fangelsisvistar í september í fyrra fyrir að vanvirða þingnefnd Bandaríkjanna en hann neitaði að bera vitni fyrir nefndinni í tengslum við rannsókn hennar á árás stuðningsmanna Trumps á þinghús Bandaríkjanna þann 6. janúar 2021.