Eitt þeirra sex sem fundust látin á lúxushóteli í Bangkok, höfuðborg Taílands, í gær, er talið hafa eitrað fyrir þeim öllum með blásýru.
Þrjár konur og þrír karlar fundust látin síðdegis í gær í svítu á Grand Hyatt Erawan-hótelinu í Bangkok.
Þau voru af víetnömskum uppruna en tvö þeirra voru með bandarískan ríkisborgararétt.
„Við erum sannfærð um að eitt af þeim sex sem fundust látin hafi framið þennan glæp,“ sagði Noppasil Poonsawas, aðstoðaryfirlögregluþjónn hjá lögreglunni í Bangkok, á blaðamannafundi í dag.
Hann sagði einnig að lögreglan teldi að blásýra hefði verið notuð til að eitra fyrir fólkinu. Glæpurinn er talinn tengjast skuld upp á milljónir taílenskra batta.
Fjölmiðlar í Taílandi greindu upphaflega frá því að skotárás hefði átt sér stað á hótelinu en lögregla vísaði þeim fréttum á bug og sagði að engar vísbendingar væru um skotárás.
Á myndum sem lögreglan birti má sjá líkin á víð og dreif um svítuna, en ekkert blóð. Einnig má sjá ósnertan mat og tvo hitabrúsa og bolla.
Fyrstu rannsóknir lögreglu leiddu í ljós að blásýra hefði verið í sex bollum. Líklegt þykir að fólkið hafi látist á mánudaginn.