Bandaríkin ætla að verja 200 milljónum dollara til að hjálpa almennum borgurum sem hafa orðið fyrir tjóni vegna stríðsins í Súdan.
Linda Thomas-Greenfield, sendiherra Bandaríkanna hjá Sameinuðu þjóðunum, tilkynnti þetta í dag.
Frá því í apríl á síðasta ári hafa verið stríðsátök milli stjórnarhers Súdans og RSF-uppreisnarhersins. Mikill fjöldi fólks hefur flúið Súdan eftir að stríðsátökin brutust út og tæplega 26 milljónir manna búa við mikið matvælaöryggi.
„Súdanir standa frammi fyrir verstu mannúðarkrísu í heiminum,“ segir Thomas-Greenfield.
„Ég er stolt af því að tilkynna að Bandaríkin veita 203 milljónir dollara til mannúðarmála,“ segir hún og bætti við að fjármununum yrði varið í að styðja fólk í Súdan, Tsjad, Egyptalandi og Suður-Súdan sem hafa orðið fyrir áhrifum af átökunum.
Frá ársbyrjun hafa Bandríkin varið tæplega 500 milljónum dollara vegna ástandsins segir Thomas Greenfield, að nýjustu greiðslunni undanskildri.
Fjárframlögum Bandaríkjanna á að verja í byggingu flóttamannaskýla, mataraðstoð, læknisaðstoð og almenna aðstoð flóttafólks.