Sjúkrahús á Gasa greindi frá því í dag að starfsfólki tókst að bjarga dreng úr móðurkviði eftir að konan lést af sárum sínum.
Auk konunnar létust 24 í árás Ísraelshers á Nuseirat–flóttamannabúðirnar á Gasa í nótt, þar á meðal voru sex einstaklingar úr sömu fjölskyldu.
Ola Adnan Harb al-Kurd var komin níu mánuði á leið er hún lést af sárum sínum á Al-Awda sjúrkahúsinu.
Í ómskoðun heyrðist hjartsláttur barnsins og framkvæmdu læknar því bráðakeisara til þess að bjarga lífi barnsins.
Drengurinn var í lífshættu en eftir að hann fékk súrefni og læknisaðstoð varð ástand hans stöðugt.
Hann var settur í hitakassa og fluttur á Al-Aqsa sjúkrahúsið í Deir el-Balah.
Kurd var ein þriggja kvenna sem lést í árásinni. Eiginmaður hennar særðist í árásinni.
Í yfirlýsingu Ísraelshers sagði að „markvissar árásir hefðu verið gerðar á innviði hryðjuverkamanna“.