Sex manns létu lífið eftir skotárás á hjúkrunarheimili í Daruvar, Króatíu í dag. Fimm heimilismenn og einn starfsmaður létust þegar árásarmaðurinn, sem bar óskráð skotvopn, fór inn á hjúkrunarheimilið og hóf skothríð, samkvæmt upplýsingum frá lögreglunni í Króatíu.
Árásarmaðurinn flúði vettvang en var handtekinn á kaffihúsi þar sem hann fannst með skotvopnið á sér. Nikola Milina, yfirmaður króatísku lögreglunnar, sagði að maðurinn hefði áður komist á sakaskrá fyrir að raska almannaheill og heimilisofbeldi.
Ekki er vitað hver ástæðan á bak við árásina er, en Marin Piletic, félagsmálráðherra í Króatíu, sagði við fréttamenn í Daruvar að það ætti eftir að koma í ljós á næstu dögum.
Eftir árásina sagði Zoran Milanovic, forseti Króatíu, á samfélagsmiðlum að skotárásin væri villimannsleg og kallaði eftir því að meira yrði gert til að koma í veg fyrir ofbeldi í samfélaginu, þar á meðal strangara eftirlit með vopnaeign.
Skotárásir eru sjaldgæfar í Króatíu og árásin í dag er ein sú versta í sögu landsins síðan það lýsti yfir sjálfstæði árið 1991.