Anna Hidalgo, borgarstjóri Parísar, segir spellvirkin sem gerð voru á járnbrautarkerfið í París ekki koma til með að hafa áhrif á setningarathöfn Ólympíuleikanna sem haldin verður í kvöld.
Þessi „óásættanlegu“ skemmdarverk „hafa engin áhrif á samgöngukerfið“ í frönsku höfuðborginni, sagði Hidalgo í samtali við spænska fjölmiðla í kjölfar fundar sem hún átti með Felipe VI spánarkonungi.
Spellvirki voru framin á járnbrautarkerfið í París í nótt. Ekki liggur fyrir hver eða hversu margir bera ábyrgð á spellvirkjunum, en franskar öryggissveitit leita nú þeirra sem standa að baki þeirra.
Þá hefur saksóknaraembættið í París hafið rannsókn á spellvirkjunum. Í tilkynningu frá embættinu segir að rannsókn sé hafin á meintu tilræði til að grafa undan „grundvallarþjóðarhagsmunum“.