Minnst tíu manns létu lífið, þar á meðal börn, og nítján særðust í eldflaugaárás frá Líbanon á knattspyrnuvöll á hinum hernumdu Gólanhæðum í Sýrlandi í dag.
Ísraelsmenn, sem segja landsvæðið heyra undir sig, kenna Hisbolla-samtökunum um árásina en líbanska ríkisstjórnin fordæmir árásir á almenna borgara.
Ísrael hernam Gólanhæðir sem tilheyrðu Sýrlandi, árið 1967 og hefur frá árinu 1981 haldið því fram að þær séu ísraelskt yfirráðasvæði. Sýrlendingar hafa hins vegar stuðning alþjóðasamfélagsins í kröfum sínum um að svæðið skuli fært þeim á ný.
Eldflaugaárásin var gerð eftir að fjórir vígmenn Hisbolla-samtakanna í Suður-Líbanon féllu í árás Ísraelsmanna.
Viðbragðsaðilar segja í yfirlýsingu að 10 manns á aldrinum 10-20 ára hafi látið lífið og 19 særst.
„Við munum undirbúa viðbrögð gegn Hisbolla... við munum bregðast við,“ segir Daniel Hagari talsmaður Ísraelshers.
Hann segir að eldflaugaárásin sé sú mannskæðasta á ísraelska borgara síðan 7. október þegar Hamas-liðar réðust inn í suðurhluta Ísraels, drápu um 1.200 manns og hnepptu um 250 í gíslingu á Gasaströndinni.
Líbanska ríkisstjórnin fordæmdi í dag öll ofbeldisverk og árásir gegn almennum borgurum, eftir að ísraelsk yfirvöld greindu frá því að tíu manns hefðu látið lífið í eldflaugaárásini.
„Það að beina spjótum sínum að almennum borgurum er svívirðilegt brot á alþjóðalögum og stríðir gegn mannúðlegum grundvallarreglum,“ sagði í yfirlýsingu frá ríkisstjórninni.
Fréttin hefur verið uppfærð: Í upphafi var fullyrt að Gólanhæðir heyrðu undir Ísrael, sem er ekki rétt, og ekki var gerð grein fyrir hersetu Ísraelshers á svæðinu og deilum hennar vegna.